സി എം അന്തരിച്ചു

കാസര്‍കോട്: പ്രമുഖ മത-ഗോളശാസ്ത്ര പണ്ഡിതനും ചെമ്പിരിക്ക^മംഗലാപുരം ഖാദിയും സമസ്ത കേരള ജംഇയ്യത്തുല്‍ ഉലമ വൈസ്പ്രസിഡന്റുമായ സി.എം. അബ്ദുല്ല മുസ്ലിയാരെ (77) കടലില്‍ മരിച്ച നിലയില്‍ കണ്ടെത്തി. വീട്ടില്‍നിന്ന് ഒരു കിലോമീറ്റര്‍ അകലെ ചെമ്പിരിക്ക കടപ്പുറത്തെ പാറക്കൂട്ടങ്ങളില്‍നിന്ന് 50 മീറ്റര്‍ മാറി തിങ്കളാഴ്ച രാവിലെ ആറുമണിയോടെയാണ് കമിഴ്ന്നുകിടക്കുന്ന നിലയില്‍ മൃതദേഹം കണ്ടെത്തിയത്. ഇദ്ദേഹത്തിന്റെ ചെരിപ്പ്, ഊന്നുവടി, ടോര്‍ച്ച് എന്നിവ പാറക്കൂട്ടങ്ങള്‍ക്ക് മുകളില്‍ ആരോ എടുത്തുവെച്ചപോലെ കാണപ്പെട്ടു. രോഗബാധിതനും അവശനുമായിരുന്ന മുസ്ലിയാര്‍ക്ക് പരസഹായമില്ലാതെ ഒരുതരത്തിലും ചാടിക്കടന്ന് പാറക്കൂട്ടങ്ങളില്‍ എത്തിപ്പെടാന്‍ കഴിയാത്തതിനാല്‍ നാട്ടുകാര്‍ മരണത്തില്‍ സംശയം പ്രകടിപ്പിച്ചു. അതേസമയം, വെള്ളം അകത്തുചെന്നതാണ് മരണകാരണമെന്ന് പോസ്റ്റുമോര്‍ട്ടം ചെയ്ത പരിയാരം മെഡിക്കല്‍ കോളജിലെ ഡോക്ടര്‍ അറിയിച്ചതായി പൊലീസ് പറഞ്ഞു.